Danggit at hawot
danggit at hawot, parehong tuyo ngayong umaga
ang aming inulam na kahit papaano'y mura
kaysa processed food o junk food doon sa groseriya
mabuti't di na muna isdang kinulong sa lata
pinirito ko sa kawali ang parehong tuyo
basta huwag masunog ay agad kong hinahango
matigas na mantika'y lumalambot sa pagluto
kasabay ng kanin, aba'y anong sarap isubo
pag masarap ang almusal, masigla ang katawan
dama mong sa anumang gagawin ay gaganahan
mahalaga'y di magutom ang tiyan at isipan
maglampaso, magwalis, maglaba, o magdilig man
danggit at hawot, isawsaw sa suka, O, kaysarap
habang sa isip ay may kung anong inaapuhap
sa pagkatha, wastong salita ang aking hagilap
upang mambabasa'y may bagong pag-asang malasap
- gregbituinjr.
04.28.2020
Martes, Abril 28, 2020
Mag-subscribe sa:
I-post ang Mga Komento (Atom)
Pagsasamang maluwat
PAGSASAMANG MALUWAT dapat ang pagsasama'y matibay ito ang lagi kong naninilay si Eros at Venus ba ang gabay o mga magulang ang patnubay ...
-
KALAT AT DUMI animo ang kalsada'y luminis ang nasabi sa akin ni misis bagyong Carina na ang nagwalis gabok, basura't dumi'y inal...
-
SALIN NG AKDA NI HEMINGWAY nakita kong muli sa munti kong aklatan akda ni Hemingway sa buhay-karagatan ang "The Old Man and the Sea&qu...
-
paglalaba'y panahon ng pag-iisip ng akda samutsaring isyu't problema'y suriin ng diwa kukusutin ang kwelyo'y may sasaglit ...
Walang komento:
Mag-post ng isang Komento