nag-order ng lunch, ngunit dadalhin ng alauna
anong klaseng lohika ito, tanong ng kasama
aba'y tanghalian nga, eh, tanghalian, aniya
bakit alauna pa, dapat alas-dose, di ba?
sa isang opisina'y nagpupulong kami noon
pinulutan ay debate bagamat mahinahon
alas-dose na't ramdam na nila ang pagkagutom
oras ng pananghalian dapat kumain doon
umaga nag-order ng lunch, alauna dadalhin
aba'y grabe na iyon, BP mo'y patataasin
pananghalian kaya dapat alas-dose gawin
inorderan ng luto'y tila walang malay man din
kung agahan nga, dapat luto na ng alas-syete
dapat kung tanghalian, luto na ng alas-dose
dapat nagluluto'y di bulag, di pipi, di bingi
nasa oras lagi yaong tunay na nagsisilbi
- gregbituinjr.
* Nilikha sa pulong ng isang koalisyon hinggil sa karapatang pantao kung saan nagkomento ang isang kasama na darating ang inorder nilang pananghalian ng alauna ng hapon imbes na sa oras ng pananghalian
Walang komento:
Mag-post ng isang Komento